💁 સ્પીકર અને પ્રવચનકારોના શબ્દો અને જીવન ની વાસ્તવિકતા: ચાહત પહેલા ચકાસવું જરૂરી, અંધભક્તિથી બચવું જરૂરી....✍️✍️✍️

 

💁 સ્પીકર અને પ્રવચનકારોના શબ્દો અને જીવન ની વાસ્તવિકતા: ચાહત પહેલા ચકાસવું જરૂરી, અંધભક્તિથી બચવું જરૂરી....✍️✍️✍️

    આજના સમયમાં સારા સ્પીકર અને પ્રવચનકારો શ્રોતાઓની લાગણીઓને ઊંડી રીતે સ્પર્શી તેમને પ્રભાવિત કરે છે. લોકોના પ્રિય દેવી-દેવતાઓ, ધર્મગુરુ-સંતો- મહાપુરુષો, નેતાઓ -આગેવાનો અથવા પીર-પેગંબરના જીવન પ્રસંગો અને તેઓ સાથે થયેલા અન્યાયની વાતો દ્વારા લોકોના દિલને જીતી લે છે. ઘણી વાર નાનાં બાળકો, સ્ત્રીઓ કે ધર્મગુરુ મહાત્માઓ સાથે થયેલા અન્યાયની વાર્તાઓથી શ્રોતાઓના દિલમાં સંવેદનાનો અને લાગણીનો દરીયો ઉભો કરે છે.  

    તેથી ઘણી વખત શ્રોતાઓ તેમનાં ચાહક બની જાય છે. સંબંધો મજબૂત કરવા, જીવનમાં પ્રગતિ લાવવા, બીમારી પરેશાની દુર કરવાના અથવા ધંધાની સફળતા માટેના નુસ્ખાઓથી લોકો પ્રેરિત થાય છે. પરંતુ અગત્યનું છે એ લોકોના જીવનની વાસ્તવિક પરિસ્થિતિ પરખવી. 

    જો લોકો પ્રવચનકારોની વાસ્તવિકતાને ચકાસ્યા વિના અંધભક્ત બને છે, તો તેઓ ધર્મ, સમાજ અને માનવતાને નુકસાન પહોંચાડે છે. આવા લોકોના ઉપદેશને જીવનમાં અવકાશ આપતા પહેલા તેમના વ્યક્તિત્વ, વાણી અને વર્તનનું મૂલ્યાંકન કરવું જરૂરી છે. 

    ક્યારેક પ્રવચનકારો પોતાના જ જીવનમાં એવી રીત જીવતા નથી જે રીતે તેઓ લોકો પાસે જીવવાની આશા રાખે છે.

- તેઓ સાદગીના ઉપદેશ આપે છે પરંતુ ચરિત્રહીન અને જાહોજલાલીની જીવનશૈલી સાથે જીવે છે.  

- ઈમાનદારીના ઉપદેશ આપે છે પરંતુ સંસ્થા કે સંગઠનના ભ્રષ્ટાચાર અથવા બેઈમાનીમાં ફસાયેલા હોય છે.  

- સંબંધો મજબૂત રાખવા કહે છે પરંતુ પોતાના નજીકના લોકો સાથે સારા સંબંધો ધરાવતા નથી.

- સમાનતા અને એકતા ની વાતો કરતા હોય છે પણ લોકોમાં ભેદભાવ અને ભાગલા પડાવવાનું કામ કરતા હોય છે..  

શ્રોતાઓ માટે સંદેશ: 

સ્પીકરો અને પ્રવચનકારના શબ્દો પર માનતા પહેલા તેમનાં જીવનના આદર્શોને જોઈને નિર્ણય લેવું જોઈએ. જે સ્પીકર કે પ્રવચનકાર પોતાના જીવનમાં જે કહે છે તે જીવે છે, તેઓ જ ચાહના અને મહત્વના લાયક છે.  

અંતિમ શબ્દ:

"વાણી પર નહીં, પરંતુ વર્તન પર આધાર રાખી સ્પીકર અને પ્રવચનકારની ચાહના કરો!"