💁 યુવા પેઢીને રાજકીય અને ધાર્મિક ઉન્માદથી બચાવો: પરિવાર અને સમાજ પ્રત્યેની જવાબદારી સમજાવો...

 

💁 યુવા પેઢીને રાજકીય અને ધાર્મિક ઉન્માદથી બચાવો: પરિવાર અને સમાજની જવાબદારી સમજાવો....

        આજના સમયમાં યુવા પેઢી રાજકીય પાર્ટીઓ અને પાખંડી ધાર્મિક સંસ્થાઓના ઝેરીલા પ્રભાવથી ભટકી રહી છે. આવા સંગઠનો યુવાનોનો ઉપયોગ પોતાના સ્વાર્થ માટે કરે છે, જ્યારે પરિવાર, ગામ અને સમાજ પછાત રહે છે. જો રાષ્ટ્રીય પાર્ટીના નેતાઓ અને પાખંડી ધાર્મિક સંસ્થાઓના સંચાલકોનો જ વિકાસ થતો હોય, તો સમજી લો કે યુવાનો અને સમાજના લોકો છેતરાઈ રહ્યા છે. આવી અંધ ભક્તિ દેશના વિકાસને નહીં, પરંતુ પરિવાર અને સમાજના પતનને આમંત્રણ આપે છે. દેશનો વિકાસ પરિવાર, ગામ અને સમાજની સમૃદ્ધિથી થાય છે, નહીં કે રેલીઓ, આંદોલનો કે ધરણાંઓથી.

       દેશની રક્ષા અને વિકાસની જવાબદારી લોકો દ્વારા ચૂંટાયેલા પ્રતિનિધિઓ અને સરકારી આવકમાંથી પગાર પામતા કર્મચારીઓની છે. તેઓ કાયદો અને બંધારણનો ઉપયોગ કરી દેશની સુરક્ષા અને પ્રગતિ સુનિશ્ચિત કરે છે. પ્રજાનું કર્તવ્ય ફક્ત આ કાયદાઓનું પાલન કરીને વિકાસમાં સહયોગ આપવાનું છે, નહીં કે રાજકીય રેલીઓ કે ધરણાંઓમાં ભાગ લઈને. યુવાનોને આ ચક્રવ્યૂહથી બચાવવા નીચેના મુદ્દાઓ પર ધ્યાન આપવું જરૂરી છે.

       સૌપ્રથમ, યુવાનોને પરિવાર પ્રત્યેની જવાબદારી સમજાવો. માતા-પિતા, દાદા-દાદી અને ભાઈ-બહેનોની સંભાળ લેવી એ તેમની પ્રાથમિક ફરજ છે. ઘરની આવક અને ખર્ચનો હિસાબ દર મહિને રજૂ કરો. દરેક સભ્યની રોજની કમાણી અને ખર્ચનું રોજમેળ લખો, જેથી યુવાનોને આર્થિક જવાબદારીનું મહત્વ સમજાય. રાજકીય કે  પાખંડ ધાર્મિક સંગઠનોની પ્રવૃત્તિઓમાં વેડફાતો સમય અને પૈસા (જેમ કે પેટ્રોલ-ડીઝલ) ગણતરી કરીને તેનું નુકસાન સમજાવો. આવા સંગઠનો તરફથી મળતા કથિત આર્થિક લાભોની વિગતો માંગો અને તેની સામે થતા ખર્ચની સરખામણી કરો.

     રાજકીય નેતાઓ અને પાખંડી ધાર્મિક સંસ્થાના સંચાલકો ઘણીવાર સત્તા, ભ્રષ્ટાચાર અને વ્યક્તિગત લાભ માટે યુવાનોનો ઉપયોગ કરે છે. આવી પ્રવૃત્તિઓમાં યુવાનોની અંધ ભક્તિ પરિવાર અને સમાજને પછાત રાખે છે. સોશિયલ મીડિયા દ્વારા ફેલાતા ઉન્માદથી યુવાનોને બચાવવું જરૂરી છે. ધર્મની રક્ષા ધર્મના ઉપદેશોનું પાલન કરવાથી થાય છે, નહીં કે બીજા ધર્મો સાથે સંઘર્ષથી.

યુવાનોને રાજકીય રેલીઓ, સભાઓ કે શિબિરોમાં ટોળાંનો ભાગ બનતા રોકો. તેમને શિક્ષણ, રોજગાર અને આરોગ્ય જેવા ક્ષેત્રોમાં આત્મનિર્ભર બનવા પ્રોત્સાહિત કરો. જે યુવાનો પોતાના પરિવાર અને સમાજ પ્રત્યેની જવાબદારી નથી નિભાવતા, તેઓ દેશ કે ધર્મની સેવા નહીં કરી શકે. તેઓ પોતાની, રાજકીય પાર્ટીની અને તેના નેતાઓની સેવા કરે છે.. દેશ કે સમાજની નહીં..  રાજકીય હોદ્દા અને સત્તાની લાલચથી દૂર રહેવું જરૂરી છે.

આજની મોંઘવારી અને આર્થિક પડકારોના સમયમાં, યુવાનોને રાજકીય પ્રપંચોના હાથામાંથી બચાવવા પરિવારે સજાગ રહેવું જોઈએ. પરિવાર, ગામ અને સમાજને આર્થિક અને સામાજિક રીતે મજબૂત કરવાથી જ દેશનો વિકાસ થશે. યુવાનોને સાચી ધર્મ સેવા અને રાષ્ટ્ર સેવાનો અર્થ સમજાવો: પરિવારની જવાબદારી નિભાવવી અને સમાજને સમૃદ્ધ બનાવવો એ જ સાચી સેવા છે.

આ આર્ટિકલ દેશના તમામ ધર્મો અને સમાજો માટે છે, કોઈ એક ધર્મ કે સમાજ માટે નથી. તેનો ઉદ્દેશ યુવા પેઢીને રાજકીય અને ધાર્મિક ઉન્માદથી બચાવી, પરિવાર અને સમાજની જવાબદારી સમજાવવાનો છે, જેથી ગેરસમજ ન થાય.

જો આ આર્ટીકલ ફાયદાકારક હોય તો ખૂબ જ શેર કરો.... દરેક whatsapp ગ્રુપ facebook ગ્રુપમાં શેર કરો...